Magisk kjøkenbenkrealisme
Lagt inn: onsdag 13. juli 2011
Velkomen til min nye blogg på Samlagets nettsider! Når eg har kalla han Kjøkenbenkrealisme, er det ikkje fordi eg innbiller meg at eg skriv alvorlege, sosialrealistiske bøker i grått. Nei. Eg er ikkje Amalie Skram, og har ingen ambisjonar om å bli det heller.
Ikkje for det, eg skriv jo gjerne om små og kvardagslege tema, og karakterane mine oppheld seg rett som det er på kjøkenet. Likevel ville det nok vore meir treffande å bruke merkelappen "magisk kjøkenbenkrealisme" , "skeiv kjøkenbenkrealisme" eller "oppblåst kjøkenbenkrealisme" om mine bøker, ettersom dei også alltid er fylte av overdriving, tull og teatrale, kjensleladde utbrot.
Men denne bloggen skal berre heite kjøkenbenkrealisme. Det er først og fremst fordi eg i haust skal jobbe med ei ny bokutgjeving, med arbeidstittelen Lengten etter kjøkenbenken. I denne boka skal eg skrive om småbarnsfamiliars val og vilkår i ein travel kvardag, og sjølv om eg ikkje trur alle foreldre lengtar etter å tilbringe meir tid ved kjøkenbenken, så skal eg i alle fall ikkje legge skjul på at eg av og til gjer det. Bollebakst blir ofte nemnt som viktig og avslappande aktivitet i småbarnsfamilien, sjølv er eg meir oppteken av kor meditativt (og lett salmiakkberusande) det kan vere å vaske kjøkenvifta eller sluket på badet.
Eg skal ikkje avsløre for mykje om innhaldet i boka, verken no eller undervegs i skrivinga. Derimot skal eg dele kjøkenbenkrealistiske opplevingar frå min eigen heim og kvardag. Sjølv om eg har to vedunderlege små ungar, kjem eg først og fremst til å fokusere på trivielt husarbeid, handleturar og det stadig tilbakevendande spørsmålet om kva som er best av buss og bil.
Ettersom eg ikkje berre er kjøkenbenkrealist (det betyr eigentleg berre "husmor" og bloggen kunne like gjerne ha heitt "husmorbloggen"), men også
karrierekvinne (det betyr eigentleg berre at eg ofte tar flyet mellom Bergen, der eg bur, og Oslo, der eg jobbar meir og meir) er det ikkje umogeleg at eg også deler trivielle opplevingar frå jobben. I haust vil det først og fremst vere snakk om
filmpremierer og
kulturrådsarbeid, men det kan også bli ein og annan skrivedag på kontoret.
Eg vil også lage nokre innlegg som eg håpar kan vere til hjelp for alle dei stakkarar som brukar bøkene mine i norsk på ungdomsskulen og vidaregåande, og desse vil eg merke med særemne. Dessutan vil eg skrive om gode bøker eg har lese, og eg kjem til å legge ut (lenker til) artiklar, kommentarar og kronikkar som har vore på trykk i ulike aviser.
Så kjære lesar, velkomen til kjøkenbenkrealisme frå Bergen og Oslo!