Nilssens andre roman, Vi har så korte armar, kom i 2002 og er komponert som ei samling med tilstandsrapportar. Boka er blitt omsett til fransk. I 2004 gav Nilssen ut barneboka Ronnys rumpe, og i 2005 kom essaysamlinga Hybrideleg sjølvgransking. Romanen Få meg på, for faen kom seinare same år og markerte eit gjennombrot for Nilssen. For boka fekk ho både Bergensprisen og Sunnmørsprisen i 2005. I 2006 blei ho som 27-åring den yngste festspeldiktaren nokon sinne under Dei nynorske festspela.

Nilssen opplevde stor suksess på Rogaland teater i 2006 med stykket Skyfri himmel, der ho samarbeidde med Bjørn Eidsvåg. Teaterversjonen av Få meg på, for faen blei spelt for fulle salar på Det Norske Teatret i 2007. I 2009 gav Nilssen ut portrettboka Nesten frelst av Sigvart Dagsland.

Nilssen har studert litteraturvitskap ved Universitetet i Bergen og vore elev ved Skrivekunstakademiet i Hordaland, der ho seinare arbeidde som akademileiar. Ho har òg vore tidsskriftredaktør i Kraftsentrum og Vagant, nestleiar i Norsk Forfattarsentrum og er frå 2010 medlem av Norsk Kulturråd.

Olaug Nilssen er frå Solheimsdalen i Førde og bur no i Bergen.