Fjortenårige Sara opplever at mora, som har vore mishandla av faren i ei årrekkje, flytter ut, og alt blir smadra. Til å byrje med står Sara temmeleg aleine, men etter kvart kjem nokre vaksne og venner som tek ansvar og viser seg å vere medmenneske. Eksplosivt stoff om ei familiekrise, heller medfølande enn desperat behandla. Boka er eit tilbod om gjenkjenning for andre i same situasjon.

Roman i tre delar om nokre kvinner som alle har eller har hatt eit forhold til journalisten Klaus. Kva er det som gjer at Klaus er som han er, og kva er det kvinner ser i ein feig, trulaus og utnyttande egoist som Klaus?

Vi får glimt av korleis kvinner har det med seg sjølv, med foreldre, barn, og med menn. Alt i eit svært personleg tonefall, som likevel kommuniserer godt. Alle novellene handlar om korleis lengt og kjærleik slit og riv i folk, som ei framand kraft innanfrå, og korleis dette pregar medvitslivet. Her er meir uttrykk enn komposisjon, i ein korthoggen, konstaterande og økonomisk språkbruk.