Auestad har utdanning frå Kunsthøgskolen i Bergen. Ho har illustrert fleire barnebøker og arbeidd med maleri. Neppe (2006) er den første boka ho sjølv både skreiv og illustrerte, og i denne vakre biletboka møter vi bamsen Neppe, som leitar etter yndlingsleika si, menneskedokka Nissen.

Kuvenninnene (2008) er ei humoristisk biletbok om vennskap og krangling – med rauting av ypparste klasse. Begge bøkene til Auestad er prega av hennar eigne illustrasjonar, som har sjarm og karakter, og som byr på fine detaljar som den vesle lesaren av bileta veit å verdsetje.

Annlaug Auestad bur på Randaberg utanfor Stavanger.